Sniðmát framtíðarinnar

sdfdVatnaskil urðu í umræðu um læknavísindi í vikunni þegar bresku lagalávarðarnir komust að þeirri niðurstöðu að löglegt væri að búa til sérhönnuð börn og er helgarnesti dagsins sérhannað í tilefni dagsins.

Látið ekki ljósa lokka blekkja ykkur: oft er flag undir fögru skinni!

Vatnaskil urðu í umræðu um læknavísindi í vikunni þegar bresku lagalávarðarnir komust að þeirri niðurstöðu að löglegt væri að búa til sérhönnuð börn. Menn eru fyrir löngu hættir að yppta öxlum yfir framförum í læknavísindum. Fyrir flestum er það daglegt brauð að heyra um eitthvert voðaflókið tæki sem getur reddað allskonar sjúkdómum og vandamálum sem enginn hafi botnað neitt í fram að þessu. Auðvitað eru framfarir af hinu góða og eðlilegt að menn hagnýti þekkingu sína í þágu þeirra sem þarfnast hennar mest, en hvar á að draga markalínu? Þannig segist læknir á meginlandinu vera búinn að finna upp maskínu sem getur skilið að sáðfrumur og breytt erfðafræðilegum eiginleikum þeirra þannig að hægt verði að sérhanna börn.

Glöggir lesendur sjá að hér er fulllangt seilst. Við erum öll ólík og kannski er bara best að svo verði áfram. Ef allir gallar verða sniðnar af okkur fyrir fæðingu verður það aðeins til þess að verstu kostir barna okkar verða taldir skástu gallar þeirra. Menn finna nefnilega alltaf eitthvað til að setja út á.

Auk þess sé ég flækjurnar sem þetta mun valda í samhlífa para alveg ljóslifandi fyrir mér:

„Sæll, elskan, ég er með barni — ertu ekki glaður?“

— „Kona, þú kemst upp með ýmislegt, en ég lýð ekki að ég sé kallaður barn!“

„Ég var að spá, ef þetta er strákur, eigum við þá ekki að biðja læknin um að tryggja að hann erfi bakháravöxtinn frá þér — en að þau verði á bringunni í staðinn…“

— „Uhhh (stuna!)…“

Þannig held ég að það sé flestum nægilegt sjokk að eignast barn og það sé hreinlega ekki á ósköpin bætandi að þurfa að sérvelja nef, augnhár og skóstærð í ofanálag við öll hin málin sem þarf að græja fyrir fæðingu. Reyndar gæti þetta sparað fátækum námsmönnum skildinginn — enda afar hagstætt fyrir budduna (í merkingunni veski, ekki feit kona!) að eignast börn sem nota öll sömu skóstærð…

69 ?

Aðvitað gæti þetta samt komið í veg fyrir allskonar óheppilegar stellingar. Þannig hefði það til dæmis verið afar heppilegt að foreldrar ákveðinna einstaklinga hefðu beðið um að stjórnmálaforingjagenið hefði verið fjarlægt úr ónefndum svilum — sem gætu þá drukkið kaffi þessa dagana í sátt og samlyndi — í stað þess að lepja lafþunna uppáhellingu í sunnudagsboðum hvort hjá öðru.

Já, börnin góð, möguleikarnir eru óþrjótandi.

En hvernig sem málum er snúið er sennilega heppilegast fyrir alla að pör í barnahugleiðingum þjösnist áfram með gamla laginu – og biðji um einn sjálfval, takk!

Góða helgi.

Halldór Benjamín Þorbergsson skrifar (Sjá alla)