Sannleikurinn er þarna úti

Stephen Hawking, eðlisfræðingurinn víðfrægi, sem almennt er talinn einn af gáfuðustu einstaklingum okkar plánetu, kom heimsbyggðinni allhressilega á óvart þegar hann lýsti yfir áhyggjum sínum af geimverum. Hann telur það fullvíst að geimverur séu til, bæði í örveruformi og sem hafa þróað með sér vitsmunalíf. Hann segir að við jarðabúar, eigum alls ekki að reyna að ná sambandi við þessar geimverur heldur reyna eftir fremsta megni að láta lítið fyrir okkur fara, svo við lendum nú ekki í klónum á nýlenduherrum alheimsins eða verðum peð í alþjóðapólitík algeimsins.

Stephen Hawking, eðlisfræðingurinn víðfrægi, sem almennt er talinn einn af gáfuðustu einstaklingum okkar plánetu, kom heimsbyggðinni allhressilega á óvart þegar hann lýsti yfir áhyggjum sínum af geimverum. Hann telur það fullvíst að geimverur séu til, bæði í örveruformi og sem hafa þróað með sér vitsmunalíf. Hann segir að við jarðabúar, eigum alls ekki að reyna að ná sambandi við þessar geimverur heldur reyna eftir fremsta megni að láta lítið fyrir okkur fara, svo við lendum nú ekki í klónum á nýlenduherrum alheimsins eða verðum peð í alþjóðapólitík algeimsins.

Þetta tímamótaviðtal er löngu tímabært að mati höfundar sem hefur lengi haft miklar áhyggjur af þeirri stöðu sem gæti komið upp við heimsókn þessara vágesta, eða allt frá því að kvikmyndin Independence day var sýnd hér í kvikmyndahúsum. Áróðursmeistarar þessarar geimverupestar hafa lengi reynt að grafa undan mikilvægi málsins með áróðursmyndum líkt og E.T ásamt tónlistarnáðargáfu Michael Jackson. Öllu stjórnað með harðri hendi af sendiherra þessara Klingóna í Norður Kóreu.

Innrás þessara geimvera myndi strax við fyrstu leysigeislaárás, hafa geigvænleg áhrif á alþjóðakerfið í heild sinni og brjóta upp öll helstu bandalög jarðarkringlunnar. Í kvikmyndinni Independence day sáum við hvernig þær samhæfðu sig og sprengdu svo helstu byggingar heimsins með ótrúlega öflugum leysigeisla. Þær voru jafnvel svo djarfar að sprengja upp Hvíta húsið. Hverskonar ómenni myndu ferðast milljónir ljósára til þess að eyðileggja fyrir okkur þau mannvirki sem eru okkur hvað kærust ?

Þessi yfirlýsing hjá Stephen Hawking og þær upplýsingar sem við höfum um innræti geimveranna hlýtur að vekja ráðamenn íslensku þjóðarinnar upp af þyrnirósarsvefni sínum gagnvart þessari aðsteðjandi ógn. Ekki síðar en í gær, þyrfti að setja á stofn sérstakt ráð sem hefði það verkefni að undirbúa helstu aðgerðir sem fara þyrfti í þegar geimverurnar gera innrás, hinn svokallaða G-Day. Telja má næsta víst að blessaða friðarsúlan mun beina fyrstu bylgju innrásar að Viðey og gefa okkur örlítið ráðrúm til að koma vörnum okkar í stað.

Helstu forgangsvandamálin yrðu hvernig við ættum að verja okkar helstu mannvirki. Við höfum séð það margoft, í óteljandi kvikmyndum, að fátt er árásargjörnum geimverum meira á móti skapi, en íburðarmiklar byggingar. Borgartún eins og það leggur sig, Korputorg og sundlaugin á Álftanesi munu án efa verða bitastæður fengur fyrir innrásarherinn ef eitthvað er að marka þessar kvikmyndir. Nauðsynlegt er því að koma upp einhverskonar kynbundnum vörnum á þessum stöðum sem fyrst.

Næst á dagskrá yrði að koma okkar mikilvægasta fólki fyrir á öruggum stað, einhvers konar neðanjarðarbyrgi myndi án efa skýla kjörnum fulltrúum og Eyjubloggurum meðan helsta skothríðin gengur yfir en eftir það þyrfti að draga strá um hver færi upp á yfirborðið til að athuga stöðuna. Mjög áríðandi er að þeir sem hafa aðgang að byrginu verði vandlega valdir af jafnréttisstofu og að í byrginu verði allt uppi á borðinu.

Mikilvægasta ákvörðunin verður þó að finna talsmann okkar gagnvart geimverunum líkt og þegar ísbjörninn kom á land fyrir norðan. Sá einstaklingur verður að vera fær um að halda úti löngum samræðum sem innihalda ekki neitt annað en upptalningu á nýlegum lýsingarorðum. Mikilvægast af öllu er þó að viðkomandi hafi ekki tengsl við útrásina af nokkuru tagi og hafi séð hrunið fyrir, eftirá.

Það er því löngu kominn tími til, eins og einn innhringjandi á Útvarp Sögu orðaði það svo vel, að ráðamenn þessa lands „fari að hugsa um fólkið í landinu“. Ísland getur orðið leiðandi afl í að fá þjóðir heimsins með sér í þennan sameiginlega leiðangur jarðarbúa gegn fingralöngu kornakrapervertunum. Væri ráðlegt að Ólafur Ragnar Grímsson myndi ávarpa heimsbyggðina eins fljótt og auðið er frá Bessastöðum til að afla málstaðnum fylgis og vonandi leiða baráttuna á heimsvísu. Er það þó einlæg ósk höfundar, ef við sigrum þennan stjörnuþokuslag, að þá fáum við að halda Lebron James áfram á jörðinni.

Vignir Hafþórsson skrifar (Sjá alla)

Vignir Hafþórsson skrifar

Vignir hóf að skrifa á Deigluna í október 2009.