Leikfangabílaeigendur æfir

Að undanförnu hafa eigendur leikfangabíla staðið fyrir hörðum mótmælum á leikskólum borgarinnar og víðar vegna hækkunar á aðflutningsgjöldum á leikfangabílum. Leikfangabílaeigendur hafa boðað enn harðari aðgerðir ef ekki verður gengið að kröfum þeirra hið snarasta að sögn talsmanns eigenda leikfangabíla.

Eigendur leikfangabíla ætla ekki að stöðva umferð um dyragættir leikskóla á höfuðborgarsvæðinu í dag. Talsmaður þeirra var sendur í skammarkrókinn í gærmorgun þegar eigendurnir töfðu söngstund á nokkrum leikskólum í borginni. Hann segir aðgerðir halda áfram þar til stjórnvöld láti undan.

Eigendur leikfangabíla krefjast þess að nestistímum verði breytt sem þeir segja íþyngjandi og að aðflutningsgjöld á leikfangabílum verði lækkuð en hækkun gjaldanna hefur bitnað harkalega á þeim. Eigendurnir stöðvuðu söngstundir fyrir helgi og í gærmorgun héldu þeir uppteknum hætti. Klukkan rúmlega níu í gærmorgun stöðvuðu þeir söngstund Grandaborgar, fyrst í 11 mínútur og svo í 7 mínútur.

Leikskólastjórar segja þá hafa tafið söngstundir í um þrjú korter. Nokkru seinna eða um hálf ellefu röðuðu stórir leikfangabílaeigendur sér í dyragættir Gullborgar, Vesturborgar og Hagaborgar og stöðvuðu með því móti söngstundir í um 45 mínútur.

Leikskólastjórar komu á staðinn og var Sturla Jóhannesson, talsmaður eigenda leikfangabíla sem taka þátt í aðgerðunum, færður í skammarkrókinn. Kristín Guðmundsdóttir leikskólastjóri segir að ófremdarástand skapist við svona aðgerðir. Ef menn fari ekki eftir fyrirmælum leikskólakennara megi þeir búast við að verða sendir í skammarkrókinn eða flengdir. Sturla segir hins vegar að svona hótanir muni ekki stöðva aðgerðir eigenda leikfangabíla. Þeir ætli þó ekki að tefja söngstundir í dag.

Þorgerður Katrín menntamálaráðherra sagðist í morgun ekki tilbúin að tjá sig um aðgerðir eigenda leikfangabíla. Hún sé að fara yfir málið með starfsmönnum ráðuneytisins.