Í kjölfar þess að kjarasamningar eru í höfn hafa álitsgjafar þjóðarinnar látið í sér heyra og deilt með þjóðinni skoðun sinni á þeim
Stjórnarandstæðingar leggja sig nú í líma við að finna samningunum sem flest til foráttu. Það kemur því fáum á óvart að Ögmundur Jónasson, þingmaður Vinstri Grænna skuli gagnrýna samningana.
Ögmundur gagnrýnir skattalækkanir á fyrirtæki og lýsir sem dæmi um að „ríkisstjórn stórfyrirtækjanna“ sé að „að hygla vel stæðum fyrirtækjum“*.
Skoðanir Ögmundar eru ekki nýjar af nálinni en þær lýsa sérstakri sýn hans á eðli fyrirtækja.
Ögmundur virðist standa í þeirri trú að „fyrirtæki“ séu fáir, mjög stórir aðilar sem græði stjórnlaust. Alltaf, allsstaðar.
Leggjum til hliðar þá staðreynd að það að reka fyrirtæki, án þess að fara á hausinn, er sérlega erfitt og meirihluti fyrirtækja leggur niður rekstur innan við 15 árum frá stofnun.**
Horfum hinsvegar á þá kenningu Ögmundar að fyrirtæki séu öll stór.
Staðreyndin er sú að langflest fyrirtæki landsins, 15.299 talsins, eru einyrkjar.
8.564 fyrirtæki til viðbótar eru fyrirtæki með tvo til níu starfsmenn***.
Með öðrum orðum er langstærstur hluti þeirra fyrirtækja, sem mun njóta lækkana á tekjuskatt, smáfyrirtæki.
Þegar stjórnmálamenn eins og Ögmundur tala gegn því að lækka álögur á fyrirtæki, gera þeir sér virkilega ekki grein fyrir því að þetta eru líka bændur landsins, smábátasjómenn og bakarar?
* Sjá heimasíðu Ögmundur (næst síðasta og síðasta efnisgrein): http://www.ogmundur.is/kjaramal/nr/3763/
** Samkvæmt rannsókn á fyrirtækjum í Evrópu og Japan var meðalævi fyrirtækja 12,5 ár. Sjá bók Arie de Geus, “The Living Company” http://www.strategy-business.com/press/16635507/18728
*** Tölurnar eru frá 2005 og fengnar á heimasíðu Hagstofunnar (www.hagstofa.is):
http://www.hagstofa.is/?PageID=638&src=…..
- Róleg og aflslöppuð aðgerðaráætlun í loftslagsmálum - 28. júlí 2021
- Í hvernig umhverfi blómstrar nýsköpun? - 8. júní 2021
- Viðskipti á tímum Covid - 20. maí 2021
