Ástir frjálslyndra hjóna

Hjónaskilnaður frjálslynda flokksins og Margrétar Sverrisdóttur er sérstök harmsaga. Það er sárt að skilja og erfið lífsreynsla.

Hjónaskilnaður frjálslynda flokksins og Margrétar Sverrisdóttur er sérstök harmsaga. Það er sárt að skilja og erfið lífsreynsla. Margrét ákvað að slíta samvistum og yfirgaf frjálslynda heimilið í upphaf vikunnar og tók sínar pólitísku reitur með sér. Og hverjar voru pólitískar reitur Margrétar? Jú það var eitthvað af börnum hennar af fyrra hjónabandi og hluti af sameiginlegum afkomendum hennar og flokksins.

Formaður flokksins segist vera sár í fjölmiðlum yfir því að Margrét hefði tekið þá ákvörðun að yfirgefa sig. Ekki leiður, heldur meira sár og jafnvel svekktur. Það er svo sannarlega erfitt að fóta sig á hálum brautum stjórnmálanna og enn þá erfiðara þegar lífsförunauturinn í flokknum ákveður að hér eftir verði ekki sameiginleg framtíð með flokk og viðkomandi og að nú skuli hvort halda í sína áttina. Stjórnmálamenn hafa þykkan skráp til þess að verjast þeim lögum sem andstæðingar koma á þá, en skrápurinn rofnar þegar makinn segir farvel karvel. Og það þrátt fyrir að makinn hafi verið orðinn hundleiðinlegur og frekur til fjörsins, líkt og forseti Íslands hefur nú verið ásakaður um að vera.

Deilur innan fjölskyldunnar geta tekið á og þegar flokkurinn ákveður að taka málstað eins af afkomendunum í stað þess að styðja móðurina á heimilinu þegar að henni var komið að vera frammi fyrir skjöldu. Og víst er að móðirin Margrét hefur nú afneitað Magnúsi Þór Hafsteinssyni sem afkomanda sínum og frjálslyndra. Magnús hefur brugðist við því með heift og jafvel hatri, enda tekur það á þegar stjúpmóðirin afneitar stjúpbarni sínu. Eldheit ást getur svo fljótt breyst í logandi hatur! Heldur var Margrét ekki hrifin af þeirri ákvörðun flokksins hennar að taka ný og kjaftfor fósturbörn með skrýtnar skoðanir úr samtökunum Nýju Afli, svo sem Höskuld Höskuldsson og Jón Magnússon.

Skilnaður sem þessi er alltaf persónulegur, tilfinningabundinn og erfiður. Margrét hefur tekið þá ákvörðun að yfirgefa heimili frjálslyndra og heldur út í óvissuna ásamt fjöldanum öllum af afkomendum sínum innan flokksins. Og eins og oft gerist við hjónaskilnaði er fundið bráðabirgðahúsnæði þar til skiptum milli hjónanna er lokið og það hjóna sem flytur út hefur bolmagn til þess að koma sér fyrir annars staðar. Og í miðju uppgjöri bíður Margrét og hugsar næsta leik og hvert hún eigi eiginlega að fara næst ásamt pólitískum niðjum sínum.

En eins og gerist við bestu skilnaði þá er það ekki aðeins tilfinningalegur hasar sem í gangi er, heldur þarf einnig að skipta reitum á milli hjóna og ganga frá fjárhagslegum skiptum á búi þeirra Slíkt getur enda reynst flókið mál og torleyst. Hefðinni samkvæmt eru síðan ættingjar flæktir í fjárskipti hjónanna sem leysa þarf við skilnaðinn. Leysa þarf til dæmis Sverri pabba Margrétar úr ábyrgðum vegna fjárskuldbindinga fyrrverandi tengdasonar síns og fósturbarns, sem frjálslyndi flokkurinn er.

Og á meðan bíður Margrét og reynir að gera upp framtíð sína og starir þegjandaleg inn í nóttina ásamt afkomendum sínum sem uppfull eru af reiði og sársauka yfir því hvernig flokkurinn hefur farið með hana og þau. Hvernig verður þetta héðan af? Mun mamma flytja með þau í félagslega íbúð, eða leigja bara? Fæst úr skilnaðinum nægt fjármagn til þess að kaupa góða íbúð til þess að búa í? Af hverju er mamma að gráta?

Og á meðan situr Guðjón Arnar, umkringdur nýju fósturbörnunum, og íhugar hvort hann hafi getað gert meira til þess að halda sambandinu áfram gangandi. Var vitleysa að segjast styðja strákinn hann Magnús? Mun fylgið hrynja af þeim? En nýju fósturbörnin segja að það sé gott að vera laus við vondu stjúpuna. Hún hafi sífellt verið að jaga og tuða í þeim og verið þeim vond! Og segja við Guðjón: .. Þetta er allt í lagi. Við skulum vera þér allt það sem Margrét var þér aldrei og saman skulum við byggja nýja frjálslynda framtíð lýð og landi til blessunar“.

Góða helgi!

Latest posts by Ari Karlsson (see all)

Ari Karlsson skrifar

Ari hóf að skrifa á Deigluna í janúar 2005.