Veggjatítlur hafa verið virkari í Norðurmýrinni en R-listinn.
|
Það er alveg hreint makalaust hvað fjölmiðlar geta verið naskir á að endurspegla raunveruleikann í allri sinni dýrð og volæði. Þannig héldu margir að markaðsmenn þjóðarinnar væru að gera góðlátlegt at í landsmönnum þegar Norðurljósasamsteypan kynnti til sögunnar sjónvarpsstöðina Stöð 2 Plús. Fyrir þá sem ekki þekkja forsöguna er viðskiptahugmyndin hreinlega sú að sjónvarpa efni Stöðvar 2 klukkutíma seinna en vanalega – svo að menn missi nú örugglega ekki af neinni sápunni á milli þess sem þeir gúffa í sig skyndibitamat og safna skuldum. Margir göptu af undrun en í huga sumra var þetta samt ágætisviðbót við annars sívaxandi sjónvarpsflóru landsmanna. Hugmyndin að baki sjónvarpsstöðinni var nefnilega ósköp einföld og skýr: Endurtekið efni á öðrum tíma.
Það fengu margir góðir menn óbragð í munninn þegar borgarstjórinn í Reykjavík lýsti því nýverið yfir að holræsagjald yrði ekki fellt niður þrátt fyrir að hreinsun strandlengjunnar við höfuðborgarsvæðið væri lokið. „Það þarf að reka batteríið“ – var viðkvæðið sem menn heyrðu þegar fulltrúar R-listans voru minntir á að holræsagjaldi hafi upphaflega verið komið á sem tímabundnum álögum á íbúa borgarinnar. En ekki hvað? Steinunn, hefði það t.d. verið sérstaklega óráðlegt að g.r.f. rekstrarkostnaði í upphaflegum áætlunum og skera niður útgjöld til annarra málaflokka sem þeim næmi?
Rækjusalat, einhver?
Svæðið í kringum Hlemm hefur sannarlega mátt muna fífil sinn fegurri og ekki seinna vænna að eitthvað sé gert í málefnum Norðurmýrar – enda fullkomlega óeðlilegt, ósmekklegt og óheilbrigt að einu framkvæmdirnar á svæðinu séu í höndum veggjatítlna!
Hugmyndir R-listans koma hins vegar of seint. Miðborgin er gjörsamlega grotnuð niður og það er ekki trúverðugt að fulltrúar flokksins komi fyrst fram með þessar tillögur korteri fyrir kosningar. Allt þvaður um að gróin borg sé í sífelldri þróun er hjóm eitt ef horft er til þess að ekkert – nema auðvitað opnun pizzastaðarins Devito’s! – hefur verið gert fyrir svæðið alla valdatíð umræðustjórnmálamannanna í borginni.
Vissulega er það rétt að betra er seint en aldrei. En ef maður pælir aðeins í þessu, þá er þetta bara anatómía 101, Dagur! Það þýðir ekkert að nostra endalaust við útlimina ef hjartað, brisið og nýrun í sjúklingnum eru óstarfhæf.
Úr einu í annað skemmtilegra: Ímyndarsérfræðingar R-listans hljóta að hafa sopið hveljur þegar þeir heyrðu af nafngiftinni Hlemmur + enda fullljóst að andstæðingar hans munu augljóslega benda á að ekkert kosningabandalag sé sterkara en summa liðanna sem að því standa.
Eða eins og markaðsmennirnir orða það…
Hlemmur plús – endurtekið efni – allt of seint.
- Vonin og óttinn - 20. október 2008
- Ný ríkisstjórn á næstu 90 leiki - 19. september 2007
- Launaskrið á Kalkofnsvegi er gott mál - 12. júlí 2007