Meðvirknigeðveikisandrúmsloft

sdfdBrostnar vonir og örlög litilla svartra svana sem umbreytast á örskotsstundu eru á meðal þess sem fjallað er um í helgarnesti dagsins.

Varúð!

Íslenska þjóðin hefur marga fjöruna sopið undanfarið. Þannig kom sú fregn sem blaut tuska framan í landsmenn að íslenska karlalandsliðið í knattspyrnu væri aðeins þremur sætum frá því að falla út af topp 100 lista alþjóðaknatt-spyrnusambandsins. Erfitt er að segja hvers vegna sú frétt kom landsmönnum á óvart. Þannig gæti það varla verið vegna þess að Íslendingar eru almennt afreksmenn í öllum öðrum íþróttum? Varla er þjóðin vön stórsigrum á íþróttasviðinu? Eða erum við kannski dálítið sérstök þegar það kemur að væntingum til einhverra sem keppa fyrir Íslands hönd? Þannig gengur íslenska liðinu svo illa að skora mörk, að gárungarnir halda því fram að liðið væri sennilega jafnvel statt ef Logi Ólafsson væru settur í framherjann – og Gunnar í Krossinum myndi taka að sér þjálfun. Gunnar og lærisveinarnir – þjált, ekki satt?

En gáfuð erum við!

Reyndar er íslenska þjóðin svo rosalega gáfuð að stofna þurfti sérstaka fegurðasamkeppni fyrir stúlkur sem geta sprangað um í efnislitlum sundfötum, brosað og tuggið tyggigúmmi í einu. Ungfrú Ísland.is voru herlegheitin kölluð.

En kæru lesendur, hér er það sem ég skil ekki! Það er ekkert nóg að halda því bara fram að önnur fegurðasamkeppnin sé gáfaðri en hin – ég vil sannnanir! Þannig yrði skemmtanagildi keppninnar talsvert meira ef menn myndu láta af tvískinnungnum og láta blessaðar fegurðardísirnar svara erfiðum spurningum á sviðinu. Ég sé þetta alveg ljóslifandi fyrir mér: Stúlkan sprangar um sviðið á pínubikiníi – en skyndilega er kastljósinu beint að henni – og hún beðin um að svara hátt og snjallt hver þversumman sé af 984637168937.

Skemmtanagildið væri rosalegt.

Fegurðasamkeppnir eru æðislegar fyrir margar sakir. Þannig er eiginlega jafngaman af fylgjast með þessum glæsilegu stúlkum og að fylgjast með viðbrögðum þeirra sem öllu óheppnari voru við upphaflega úthlutun og að fylgjast með viðbrögðum femínista.

En hvað er það nákvæmlega í þjóðarsálinni sem fær Loga Ólafsson, Gunnar í Krossinum, íslenska knattspyrnulandsliðið, fegurðardrottningar og femínista til að henda skynseminni fyrir róða og veðja á að fulltrúar Íslands nái að ryðja öllum hindrunum úr vegi og sigra – undantekningarlaust.

Hópeflismeðvirknigeðveikisandrúmsloft?

Góða helgi.

Latest posts by Halldór Benjamín Þorbergsson (see all)