Það er ekki mælt með því að lýtalæknar taki 2 töflur 5 sinnum á dag fyrir aðgerð, enda geta afleiðingar verið skelfilegar eins og frillan að ofan fékk að reyna.
|
Í nýlegri skýrslu Læknasamtakanna var endanlega staðfest að þjóðin samanstendur af hálfvitum. Reyndar 67%-vitum, til að halda tölfræðinni til haga. Í vikunni kom Guðni Ágústsson svo í Kastljósið og sagði að landbúnaðarráðuneytið hefði aldrei haft meira vægi en einmitt þessa dagana. Á hinni stöðinni mökuðu síðan þáttastjórnendur terpentínu á andlit barnastjörnumóður í nafni fegurðar. Pistlahöfundur spyr: „Er ekki allt í sóma í Oklahóma“?
Í téðri könnun kom fram að 21% landsmanna botna bara ekkert í því, þegar einhver segir við þá, að þeir eigi að taka eina töflu tvisvar á dag. Því síður hafa þeir hugmynd um hvað aukaverkanir eru, en hins vegar höfðu ríflega 72% landsmanna útskýringu á bakflæði á hraðbergi. Af þessu getum við dregið nokkrar ályktanir sem læknastéttinni yfirsást. Það að skilja ekki hvað ein tafla tvisvar á dag þýðir, verður þess valdandi að menn taka t.a.m. 2 töflur 5 sinnum á dag — sem aftur veldur því að allar aukaverkanir hverfa í lyfjamókinu — sem skýrir aftur gríðarlegar vinsældir bakflæðis — enda augljóst að menn hljóta að þurfa að æla ofurlyfjaskömmtunum upp á nýjan leik!
Er þetta hugsanlega langsóttasti brandari sem birst hefir á Deiglunni? Tja…
Hvernig sem á könnunina er litið sökkuðu niðurstöðurnar — enda kom fram að aðeins 33% vissu deili á sjúkdóminum sökk. Varðandi lestrarkönnunina í heild sinni, er hægt að fullyrða, að annað hvort hafi úrtakið verið hneigt að portúgölskum starfsmönnum Impregilo — eða hitt, að fólk er svona illa læst.
En af hverju erum við svona vitlaus? Það er alla vegana ekki vegna þess að við glápum of mikið á bandarískar glæpakvikmyndir. Ef svo væri, myndum við vita, að það kann ekki góðri lukku að stýra, að framvísa persónuskilríkjum áður en menn fremja hótelrán. En hvað er fólk þá að hugsa? Hugsanlega þetta: „Hmmm, ég er búinn að taka 2 töflur 5 sinnum í dag, framvísa persónuskilríkjum um leið og ég rændi sjoppuna — kannski ég skelli mér bara í lýtaaðgerð…“.
Ég ætla nú ekki að gerast svo kræfur að væna stjórnendur Íslands í bítið um að vera í stanslausu lyfjamóki, en maður hlýtur að setja spurningamerki við barnastjörnuna. Og hvað gerir mamman þegar hún fréttir af þessu til að sýna dóttur sinni stuðning? Reynir hún að telja henni hughvarf? Benda henni á að gera þetta bara á læknastofu — en ekki í settinu hjá barnaþættinum Afa? Nei, mín skellir sér bara líka!!! Í ljósi nýlegrar umræðu um kukl með mannslíkamann er allavegana fullljóst, að pistlahöfundur mun hafa varan á næst þegar hann heyrir um, að einhver ætli að bregða undir sig betri fætinum!.
Er von nema lesendur spyrji, hvort ekkert lýti sé svo lítið að líta megi fram hjá því? Nei, alla vega ekki Guðni Ágústsson. Ég veit satt að segja ekki hvort væri betra fyrir þjóðina; að láta lýtalækni spartla upp í túlan á honum eða gefa honum 2 pillur 5 sinnum á dag. Hitt er hins vegar ljóst, að tæplega 39% áhorfenda trúðu honum ekki þegar hann sagði, að landbúnaðarráðuneytið hefði verið í traustum höndum undir hans stjórn. Ríflega 64% bænda höfðu ekki efni á að greiða afnotagjöld og sáu því ekki þáttinn, en af þeim sem höfðu sjónvarp voru 11% sammála Guðna. Hin 25% voru of upptekin við að höggva fjöskylduborðstofuborðið niður í eldivið.
Annars er öll þessi umræða ömurleg og helgarnestið ber þess svo sannarlega keim — enda vitavonlaust að ræða þessi mál. Svona svipað eins og að pissa og hnerra í einu. Algerlega ómögulegt og hefir pótentíal í að skapa almannatengslamartröð þegar þú kemur út af klósettinu — með hvítt hor á höndunum og rennblautar gallabuxur!
Góða helgi.
- Vonin og óttinn - 20. október 2008
- Ný ríkisstjórn á næstu 90 leiki - 19. september 2007
- Launaskrið á Kalkofnsvegi er gott mál - 12. júlí 2007