Vaskdagurinn mikli

Í gær var virðisauki á matvælum og fleiri vörum lækkaður. Einhver mesta kjarabót sem Íslenskir neytendur hafa fengið í mörg ár. Neytendur hafa sýnt vakningu í neytendamálum og verslanir hafa burgðist við með því að lækka vöruverð fyrir tímann. En hvað endist þetta lengi?

Í gær var virðisauki á matvælum og fleiri vörum lækkaður. Einhver mesta kjarabót sem Íslenskir neytendur hafa fengið í mörg ár, ekki síst stórar fjölskyldur sem þurfa að kaupa mikið inn fyrir heimilin. Ýmsir hafa verið að tala þetta niður sérstaklega stjórnandstaðan og bent á að fyrirtæki muni taka þetta til sín.

Raunin hefur verið allt önnur, þvert á móti hafa verslanir og þjónustu fyrirtæki ráðist í kynningar átök í kringum þetta. Bónus lækkaði virðisaukaskattinn strax viku fyrr en gaf í rauninni bara afslátt. Aðrar lágvörubúðir fylgdu með. Veitingastaðir auglýstu einnig lækkaðan virðisauka.

Það hefur verið algjör samstaða á öllum stöðum að þetta verði raunveruleg lækkun sem skili sér til neytenda. Það stefnir því í að þetta verði mjög góð aðgerð hjá ríkisstjórninni sem mun skila sér til allra, ekki síst þeirra sem virkilega þurfa á því halda, fjölskyldufólks með stórar fjölskyldur.

Strax í gær fóru neytendur að benda á fyrirtæki sem lækkuðu ekki, var gengið svo langt að litlir söluskálar út á landi voru sérstaklega tilkynntir til Morgunblaðsins fyrir að hafa ekki lækkað súpu dagsins. Þetta var þó skyndilega lagað og munu gestir staðarins fá ódýrari súpu í dag en í gær.

Íslendingar hafa ekki verið þekktir fyrir neytendavitund, og hafa Neytendasamtökin nánast talað út í vindinn þegar þau hafa verið að benda neytendum á misferli. Nánast einu aðilarnir sem hafa tekist að fá fólk til þess að versla ekki á ákveðnum stöðum voru rasistarnir sem gáfu út „svarta listann sinn“ á netinu og bentu öðrum rasistum á að versla ekki á ákveðnum stöðum, sem betur fer entist það þó ekki lengi.

Verði þessi breyting til þess að neytendavitund aukist á Íslandi, væri það öllum neytendum til góða. Samstöðuleysi neytenda á Íslandi er ein ástæðan fyrir háu vöruverði á landinu og að það eru kaupmenn sem ráða ferðinni frekar en neytendur. Maður efast þó um að þessi mikla neytendavakning lifi langt fram yfir helgi.

Latest posts by Tómas Hafliðason (see all)

Tómas Hafliðason skrifar

Höfundur hefur skrifað á Deigluna frá árinu 2002. Höfundur er verkfræðingur frá Háskóla Íslands og rekur eigið fyrirtæki.