Eins og glöggir lesendur Deiglunnar hafa tekið eftir hefur lítið verið skrifað síðustu vikurnar. Hin læknisfræðilega skýring er síþreyta, hin félagslega afsökun kallast árshátíð og hin lögfræðilega túlkun er vanefnd; aðili efnir ekki skyldu sína á réttum stað og réttum tíma.
Ummæli menntaskólakennara míns rifjuðust upp fyrir mér um daginn, þegar Ingibjörg borgarstjóri sagði að hún ein réði því hver skipaði 9. sæti R-listans. Þessi ágæti maður, sem er sögukennari við Menntaskólann í Reykjavík, sagði í tengslum við borgarstjórnarkosningarnar 1994, að kominn væri tími til að gefa Sjálfstæðisflokknum frí frá borgarmálum; flokkurinn hefði verið einráður um stjórn borgarinnar, allt vald spillti og algjört vald gerspillti. Þessi sjónarmið réðu stuðningi hans við hinn „lýðræðislega“ R-lista, en innan hans átti lýðræðið að blómstra og valdinu yrði dreift eins og kostur væri. Annað hefur þó komið á daginn og fróðlegt væri að vita afstöðu þessa tiltekna sögukennara til vinnubragða dRauma-listans.
Fótbolti er ekki lengur bara fótbolti. Margir hafa viljað trúað því að knattspyrna væri yfir markaðinn hafin; að hún jafnaðist helst á við einhvers konar trúarbrögð. Ensk knattspyrnufélög (hér er einkum átt við skjólstæðing Deiglunnar, Manchester United) fara nú hvert af öðru út á hlutabréfamarkaðinn og gengi þeirra þar virðist ætla að verða mikilvægara en gengi liðsins inni á vellinum. Þessi þróun er góð – út frá kapítalísku sjónarhorni – félög eru ekki byrði á hinu opinbera og sjá um sig sjálf.
En spurningar vakna um hinn trúabragðalega þátt knattspyrnunnar. Sveiflast áhangendur í framtíðinni milli félaga vegna sinna eigin peningahagsmuna eða verður áfram einhvers konar trygglyndi? Á það ber að líta að oft fara þessi sjónarmið saman; ef liði gengur vel á knattspyrnuvellinum aukast tekjur þess og þar með hækka hlutabréf í félaginu. Sú þróun væri hins vegar slæm, ef stjórn á knattspyrnulegum þáttum félagsins væri í ríkari mæli seld undir vilja kaupahéðna, sem hefðu ekki hina trúarbragðalegu sýn á heim knattspyrnunnar.
- Rétta leiðin er aldrei auðveld - 3. febrúar 2023
- Foreldramótin - 10. júlí 2021
- Veiði eða della - 30. júní 2021
